كيف تعرف الليبي يا مقنّط يا غالي ؟
- كان سمعت حد يقول شنو الجو, صقع عليك........فهذا بالتأكيد ليبي
- كان لقيته ماسك نص تن في يد وفي اليد التانية سبسي ....فهذا بالتأكيد ليبي
- كان عطاك موعد وجاك بعد ساعة أو ساعتين ....فهذا بالتأكيد ليبي
- كان قالك خمسة دقايق وقعد ساعتين.....فهذا بالتأكيد ليبي
- كان قالك شبوب والنبي ولعة ...والنبي سبسي....فهذا بالتأكيد ليبي
- كان لقيت في يده باكو مكتوب عليه رياضي.....فهذا بالتأكيد ليبي
-وكان قالك شبوب ممكن العكشة.....والا تعكشلي...فهذا بالتأكيد ليبي
-كانك علي شط البحر ولقيت واحد رادم دلّاعة علي الشط والا صندوق مشروب فهذا بالتأكيد ليبي
-كان بدا يبي ينكت ....يقولك مرة في واحد ......مع احترامي فهذا بالتأكيد ليبي
-كان لقيت واحد يقول للبيجو 404 موديل75 عكارية أو قلع ....فهذا بالتأكيد ليبي
-كان بدا يهدرز علي العائلة الكريمة وقالك الشايب - علي
بوه-...والعْزيّز- علي امه -...فهذا بالتأكيد ليبي
-كان دق عليك عيل صغير وقالك تسلم عليك امي وقالتلك حكة طماطم ...ولا حكة زيت ...شوية ملح.....فاعلم أن جيرانك ليبين
-كان لقيت بنية صغيرة تغني عيلة ياعيلة...هذي ماتحكش فيها راسك بكل لإنها ليبية
-كان سألت واحد وقلتله شنو أكتر أكلة تحبها وقالك بازين...ومكرونة إمبكبكة ...فهذا بالتأكيد ليبي
وأخيرا وليس آخرا أفتخر بأني ليبية والحمد لله إني جيت ليبية
... وصدق اللي قال كان ماجيتش ليبي راهو فاتك الجو كله